Baarlo Vrouwe 1 make knieval in Gemert

Gemert VR1 – VV Baarlo VR1   5-2 (2-1)

Eine lestige wèdsjtried stong op 't programma, Gemert oet. In de vreeskaoj begoste weej aan de warming-up op 't strakke kunstgraas. 'T ging good, 't veulde good en de trainers waare tevreeje, weej hadde d'r vertrouwe in. Lets go!

De goije warming-up kóste weej doortrekke noa de wèdsjtried, 't begós good. We merkte medein det 't eine pittige taegesjtander waas dae sjnel en fel waas. Tòg zoote we d'r good baovenop, en waare we zelf ouch good aan 't balle. Weej bleeve röstig aan de bal en tikte good euver en probeerde kombinasies te make. Tog veel de ieërste goal in 't veurdeil van Gemert. Via goije en sjnelle kombinasies kwaam de aanvalster van Gemert oug in oug met Sai en plaatste de bal in de hook. Nao óngevieër 10 minuten sjpeule stjing 't 1-0. Weej leete ós neet gek make en wiste det weej ouch kanse krege. Óngevieër 5 minute later mocht Janne aanlegge veur de ieërste corner veur Baolder. Zeej raakte höm hersjtikke verkieërd en de bal kwaam totaal neet woar ze höm geplaatst had. öngertösse det zeej zich al verontsjuldigde veur de sjlechte corner, dreijde de bal lestig en lieëg in de korte hook. De verdeidigers van Gemert hadde um neet verwach en hae veel zoë mer binne, 1-1! Alles waas nog meugelijk en weej bleve vechte mit 't  hieële team.

Gemert waas sjterk aan de bal, dao hadde weej 't lestig mei mèr de verdeidiging sting good. Tog hadde sommige sjpeulsters te vuuël kwaliteite en kóste weej neet alles sjtoppen. Zoë ouch de 2-1 dae zeej scoorde. Un sjpeulster lag de bal klaor vanaaf 25 maeter en ramde de bal rechsjtreeks de kruutsing in. Niks aan te daon, gewoeën blieve voetballe! Weej koste ouch kenskes kreeëren en kwame ouch gevaorlijk dich beej de goal van Gemert. Allein ontbrook 't nog aan de letste pass of aafwerking.

De supporters kóste beej rös binne aan de werme koffie of chocomel en weej ginge de kleidkamers in mèt unne 2-1 achtersjtand. De trainers ware neet ontevreeje en weej mósde weer gaon voetballe zoë as de ieërste 20/30 minute die zoë good ginge.

Mèt wat wissels in beide elftalle begoste we aan de twieëde helft. We kwame lestig op de hèlf van Gemert en ware veural aan 't verdeidige. Vuul Gemertse aanvalle haet ozze verdeidiging good d'r oet kenne haole, tòg bleef 't lestig. Zoë ouch toen un sjpeulster van Gemert in de 16 van ós kwaam mét de bal aan de voot.In 'n poging öm de bal aaf te pakke leet de sjpeulster zich valle en de sjeids zoog dao un euvertraejing in, penalty. De aanvoerster lag de bal op de sjtip, Sai keek ze rech in de ouge aan met ein intimiderende blik. De bal waor in de rechter baovehook geplaats, Sai zoot d'r nog mèt de vingers aan mèr kós höm net neet wegtikke. Helaas 3-1.

Weej kwame d'r moeilijk oet en kwame neet lekker in ós eige sjpelke.

Weej mósde iets gaon daon as weej 't nog sjpannend woeëje haoje, hop 1 op 1 voetballe en mèt z'n alle nao veure. Gemert waas 't heejdoor effe kwiet en weej krege mieër ruumte. Noa eine goije aanval van opkomende back Denise heij Baolder eine corner verdeend. Janne probeerde zoë as altied de bal richting ozze köppers Heidi en Romy te plaatse. Romy kreeg zichzelf vreej door un goije loupactie, kós de kop taege de bal aan kriege en plaatste um uever alles en idderein in t netje, 4-2!

Zal 't dan tóg nog...? Weej ware hoeëg aan t voetballe en nome vuuël risico. Dit goof beide teams aaf en toe vuuël ruumte. Janne sjteurde Sandra op sjnelheid weg en die kós op de keeper aafsjtorme veur de 4-3. De keeper kwaam good oet en wis ein goal veur Baolder te veurkomme. Mét nog wat lange balle en sjtaekballe probeerde weej nog ein geulke te forsere, echte groeëte kanse hubbe weej noëts gekrege. Doordet weej zoë vuuël risico nome, kwaam d'r natuurlijk ouch vuuël ruumte in de omsjakeling veur Gemert. Duudelijk waas det Gemert 't aafwerke neet euversleijt op de traininge. Weer ein hard aafsjtandssjót belandde boete t bereik van Sai in 't net, 5-2.

Helaas verlaore van eine sjterke taegesjtander, mér waal mèt z’n alle gesjtreeje en mét vlaage good voetbal laote zeen!

Op noa de letste wèdsjtried veur de wintersjtop:

VV Baarlo VR1 – EGS’20 VR1 öm 11 oor!